சாம்ப்ராஸின் சாதனையை முறியடிப்பதற்கு பெடரருக்கு ஒரு வெற்றிக் கிண்ணம் தேவை

டெனிஸ் உலகில் அதிக கிராண்ட்ஸ்லாம் பட்டங்கள் வென்றுள்ள அமெரிக்காவின் பீற் சாம்ப்ராஸின் சாதனையை (14 பட்டம்) பெடரர் நெருங்குகிறார். தற்போது 13 கிராண்ட்ஸ்லாம் பட்டம் வென்றுள்ள இவர், இன்னும் ஒரு பட்டம் வென்றால் மகத்தான சாதனையை எட்டலாம்.

பெடரர் தொடர்ந்து 5 முறை விம்பிள்டன் (2003, 2004, 2005, 2006, 2007) ஓப்பன் பட்டங்களை (2004, 2005, 2006, 2007, 2008) வென்றுள்ளார். மூன்று முறை அவுஸ்திரேலியன் ஓப்பனில் கிண்ணத்தை (2004, 2006, 2007) கைப்பற்றியுள்ளார்.

விம்பிள்டன், அமெரிக்கன் ஓப்பன் என இரண்டு கிராண்ட்ஸ்லாம் போட்டிகளில் தொடர்ந்து 5முறை சாம்பியன் பட்டம் வென்ற உலகின் முதலாவது வீரர் என்ற பெருமை பெறுகிறார் பெடரர் 1924 இல் அமெரிக்காவின் பில் டில்டனுக்கு பின் ஓப்பனில் தொடர்ந்து 5 முறை பட்டம் வென்றுள்ளார்.

இதேவேளை, ஏ.டி.பி. தரவரிசை பட்டியலில் ஸ்பெயின் வீரர் ரபெல் நடால், 7000 புள்ளிகளுடன் தொடர்ந்து முதலிடத்தை தக்க வைத்துள்ளார். அமெரிக்க ஓப்பனில் பட்டம் வென்ற பெடரர் இரண்டாவது இடத்தில் (5930 புள்ளிகள்) நீடிக்கிறார். மூன்றாவது இடத்தில் செர்பியாவின் நோவோ டோகோவிச் உள்ளார். இங்கிலாந்து வீரர் ஆன்டி முர்ரே இரண்டு இடங்கள் முன்னேறி நான்காவது இடம்பிடித்துள்ளார்.

அமெரிக்கன் ஓப்பனில் தனது ஆதிக்கத்தை மீண்டும் நிலைநாட்டிய ஆன்டி முர்ரேவை வீழ்த்தி சம்பியன் பட்டத்தை தட்டிச் சென்றது குறித்து ரோஜர் பெடரர் கூறியதாவது;

இந்த ஆட்டத்தில் சிறப்பாக "சேர்வீஸ்' செய்தேன். இதனால் முர்ரேக்கு நெருக்கடி கொடுக்க முடிந்தது. முதல் செட்டை நம்பிக்கையோடு எதிர்கொண்டு சுலபமாக கைப்பற்றினேன். இரண்டாவது செட்டில் முர்ரேசேர்வீசை "பிரேக்' செய்தது ஆட்டத்தின் திருப்பு முனையாக இருந்தது. தொடர்ந்து இரண்டு செட்களை பறிகொடுத்த முர்ரே மூன்றாவது செட்டில் தாக்குப்பிடிக்க தடுமாறினார். அமெரிக்கன் ஒப்பன் பட்டம் வென்றது, உலகமே என் கையில் வந்தது போன்ற உணர்வை ஏற்படுத்திவிட்டது. என்னால் நம்ப முடியவில்லை.

இது வாழ்க்கையின் முக்கிய அம்சமாக இருக்கும். வெற்றிக் கிண்ணத்துடன் நாடு திரும்புவது மகிழ்ச்சியாகவும் மனநிறைவு தருவதாகவும் உள்ளது. விம்பிள்டன், பிரெஞ் ஓப்பன் தொடர்களில் தோல்வியைத் தழுவியது மனக் கசப்பை உண்டாக்கியது. இருப்பினும் இந்த ஆண்டு இறுதி கிராண்ட்ஸ்லாம் போட்டியில் பட்டம் வென்றது, டெனிஸ் வாழ்க்கையில் புத்துணர்ச்சி அளிப்பதாக உள்ளது. 13 ஆவது கிராண்ட்ஸ்லாம் போட்டியுடன் என்னுடைய வெற்றிநடை முடியவில்லை. இது கம்பீரமாகத் தொடருமென்றும் கூறினார்.